Даведацца пра гэта маглі ўдзельнікі Форума “Годнае даўгалецце”, якія аднымі з першых пазнаёміліся з вынікамі найноўшага даследавання пра ролю і вобраз сталага чалавека ў беларускім грамадстве.
Вынікі даследавання прадставіла супрацоўніца Навукова-даследчага інстытуту Міністэрства працы Наталля Мількота.
Як вынікае з даследавання, большасць сталых беларусаў адчувае да сябе павагу і ўвагу з боку іншых людзей, што моцна кантрастуе з сітуацыяй у суседняй Расіі.
Больш за тры чвэрці апытаных сталых беларусаў не сутыкаліся ў жыцці з парушэннем сваіх правоў і дыскрымінацыяй.
А вось да канцэпту актыўнага даўгалецця беларусы пакуль ставяцца асцярожна: большасць удзельнікаў даследавання схіляецца да таго, што ў сталым веку трэба займацца хатняй гаспадаркай ды дапамагаць дзецям ды ўнукам. І толькі невялікая частка апытаных адзначыла, што сталы ўзрост – гэта час для самарэалізацыі, валанцёрства, атрымання дадатковай адукацыі, заняткаў спортам, камунікацыі з іншымі людзьмі ў інтэрнэце. Да прыкладу, валанцёрскай дзейнасцю хацелі б займацца менш за 3% сталых беларусаў.
А што ж хвалюе сталых беларусаў? Найперш – пагаршэнне здароўя, недахоп грошай, а таксама адставанне ва ўзроўні валодання лічбавымі тэхналогіямі.
Падсумоўваючы прадстаўленне вынікаў даследавання, Наталля Мількота адзначыла, што змены ў стаўленні сталых беларусаў да сябе і сваёй ролі ў грамадстве адбываюцца, хоць і вельмі павольна.
– Жаданне і гатоўнасць жыць інакш у людзей ёсць. Трэба даць ім ўпэўненнасць, што гэта нармальна – адзначыла Наталля Мількота.
Вялікі інтарэс удзельнікаў Форума выклікала і прэзентацыя прадстаўніка CIVITTA Group SATIO Філіпа Біканава пра стаўленне беларускага грамадства да сталых людей.
Вось некалькі тэзісаў з гэтай прэзентацыі:
- Беларусы лічаць, што да сталых людзей не праяўляецца дастаткова павагі;
- Стэрэатыпы ў дачыненні да сталых людзей – найчасцей негатыўныя;
- Фінансавая абароненасць і магчымасць падарожнічаць у сталым веку – гэта не пра беларусаў;
- Менш за ўсё ў сталым веку людзі хацелі б працягваць працаваць і займацца грамадскай дзейнасцю;
- Большасць беларусаў лічыць, што трэба адкладаць грошы на старасць, але самі робяць гэта вельмі рэдка. Тое ж тычыцца заняткаў фізкультурай і спортам.
Даследаванне было праведзена CIVITTA Group SATIO па замове Фонд ААН у галіне народанасельніцтва (ЮНФПА) у Беларусі і Навукова-даследчага інстытута Міністэрства працы і сацыяльнай абароны насельніцтва.
Разынкай Форума ў час дыскусіі пра вобраз сталага чалавека стаў выступ вядомай беларускай блогеркі Вольгі Шатыка.
Форум “Годнае даўгалецце: роўныя магчымасці для ўсіх пакаленняў” адбыўся 1-2 кастрычніка ў Мінску і быў арганізаваны кааліцыяй “За годнае даўгалецце”.
Чытайце таксама:
“На гэтым сацыяльным полі працы хопіць усім”. У Мінску праходзіць Форум годнага даўгалецця
Жыць і сталець годна: знаёмім з матэрыяламі Форума “Годнае даўгалецце”
Праект Нацыянальнай стратэгіі “Годнае даўгалецце-2030” быў прадстаўлены ў Мінску
Форум “Годнае даўгалецце”: каментуюць арганізатары і эксперты
Як зрабіць, каб голас сталых людзей быў пачуты: досвед Германіі
Фотасправаздачу з Форума глядзіце тут.
Фота Антона Сурапіна
