Актывісты валанцёрскага руху сталых людей з усіх рэгіёнаў краіны сабраліся 5 снежня ў Мінску на Першы Злёт валанцёраў “срэбранага”ўзросту. Удзел у сустрэчы бралі і прадстаўнікі кааліцыі “За годнае даўгалецце”.
У час імпрэзы былі прадстаўленыя прыклады арганізацыі валанцёрскай працы на базе “Чырвонага крыжа”, Рэспубліканскага геранталагічнага цэнтра (актыўнага даўгалецця).
Пра свае валанцёрскія ініцыятывы распавялі таксама прадстаўнікі кожнага рэгіёну краіны.
Каардынатар кааліцыі “За годнае даўгалецце” Вітаўт Руднік у сваім выступе сфакусаваўся на выкліках, якія стаяць сёння перад валанцёрскім рухам сталых людей.
Вітаўт Руднік:
Кольскасць людзей пенсійнага ўзросту ўжо сёння складае каля 25% і будзе працягваць хутка расці. Але ці будзе расці колькасць “срэбраных” валанцёраў, якая складае зараз па ацэнках навукова-даследчага інстытуту міністэрства працы, усяго каля 3%?
На думку Вітаўта, для таго, каб гэты паказчык рос, неабходна стымуляваць стварэнне новых грамадскіх арганізацый (у тым ліку арганізацый, заснаванымі самімі сталымі людзьмі), новых адукацыйных пляцовак кшталту універсітэтаў трэцяга веку, а таксама шырокае прызнанне валанцёрскай дзейнасці.
Вітаўт Руднік распавёў таксама пра дзейнасць актыўнага сябра кааліцыі – Міжнароднага грамадскага аб’яднання “Узаемапаразуменне“. З 2009 года гэтая арганізацыя падтрымала каля 170 праектаў, накіраваных на паляпшэнне якасці жыцця былых ахвяраў нацысцкага рэжыму, а таксама іншых сталых людзей. Амаль у кожным трэцім з гэтых праектаў вялася актыўная валанцёрская праца.
Выступоўца распавёў таксама пра дзейнасць валанцёраў гарадзенскага “Універсітэту Залатога Веку“: “Школу добрых справаў”, апеку над людзьмі з псіха-неўралагічнага дыспансэру, цяжкахворымі падапечнымі “Гродзенскага дзіцячага хоспісу і інш.”.
У заключнай частцы Злёту адбылося ўзнагароджанне лепшых валанцёраў і арганізацый, якія актыўна развіваюць валанцёрскі рух сталых людей.
Падзякі з рук міністра працы Ірыны Касцевіч атрымалі і две арганізацыі – сябры кааліцыі “За годнае даўгалецце”: міжнароднае грамадскае аб’яднанне “Узаемапаразуменне” (Мінск) і ГА “Цэнтр “Трэці сектар” (Гродна). Падзякамі былі адзначаныя і некалькі валанцёраў з арганізацый, якія бяруць удзел у праграме “Месца сустрэчы: дыялог”, якая адмініструецца ў Беларусі “Узаемапаразуменнем”.
Злёт быў арганізаваны Міністэрствам працы і сацыяльнай абароны насельніцтва пры дапамозе Міжнароднага грамадскага аб’яднання “Узаемапаразуменне” і быў прымеркаваны да Міжнароднага дня валанцёраў, які адзначаецца 5 снежня.
