Такія сустрэчы пройдуць да канца чэрвеня ў Бабруйску, Гродна, кобрыне і Мінску і будуць арганізаваныя сябрамі кааліцыі “За годнае даўгалецце”.
Ацэнка патрэбаў будзе базавацца найперш на метадалогіі Глабальнай сеткі гарадоў і супольнасцяў, прыязных да сталых людзей.
У аснове гэтай метадалогіі закладзены прынцып актыўнага ўдзелу саміх сталых людзей у працэсе ацэнкі патрэбаў, а таксама пералік канкрэтных параметраў, па якіх праводзіцца такая ацэнка.
Вось гэтыя індыкатары:
– Вулічная прастора і будынкі.
– Транспарт.
– Жытло.
– Удзел у жыцці грамадства.
– Павага і сацыяльная ўключанасць.
– Грамадскі ўдзел і занятасць.
– Камунікацыя і інфармацыя.
– Сацыяльная абарона і ахова здароўя.
8 чэрвеня адбылася онлайн сустрэча актывістаў кааліцыі, на якой былі прадстаўленыя дапаможнік і іншыя матэрыялы, якія могуць спатрэбіцца для арганізацыі такой сустрэчы.
Апрацаваныя вынікі будучых сустрэч будуць прадстаўленыя ў дапаможніку “Як зрабіць свой горад прыязным для сталых людзей”.
Выданне дапаможніка, як і правядзенне сустрэч па ацэнцы патрэбаў сталых людзей, адбываюцца ў межах праекта, які здзяйсняецца міжнародным грамадскім аб’яднаннем “Узаемапаразуменне” (Мінск) у партнёрстве з шэрагам іншых сябраў кааліцыі пры спрыянні Праграмы падтрымкі Беларусі (ППБ).
Праграма падтрымкі Беларусі рэалізуецца Дортмундскім міжнародным адукацыйным цэнтрам (IBB Dortmund) па даручэнні Федэральнага міністэрства эканамічнага супрацоўніцтва і развіцця (BMZ) і Германскага таварыства па міжнароднаму супрацоўніцтву (GIZ).
