Да ўдзелу у Акадэміі, якая будзе працаваць 23-26 жніўня пад Мінскам, запрашаюцца актывісты універсітэтаў залатога/трэцяга веку, клубаў, а таксама іншых супольнасцяў сталых людзей.
Мэтай Акадэміі з’яўляецца ўмацаванне лідэрскага патэнцыяла актыўных сталых людзей у галіне планавання ўласнага развіцця, працы ў камандзе, а таксама ўдасканалення дзейнасці адукацыйных і іншых пляцовак, якія яны прадстаўляюць.
Што будзе адбывацца ў час Акадэміі?
Канцэпцыя сёлетняй Акадэміі пабудаваная на падыходзе, які ўмоўна называецца “Я – Мы – Справа”.
Гэты падыход прадугледжвае імкненне да балансу паміж персанальнымі інтарэсамі, інтарэсамі групаў, да якіх мы прыналежым, а таксама тых важных справаў, якімі мы займаемся разам са сваімі паплечнікамі.
Таму ў час заняткаў будзе месца і для развагаў пра свае планы, прыярытэты, жыццёвыя каштоўнасці, і для дыскусій пра тое, як больш эфектыўна працаваць у камандзе, і для планавання тых справаў, якія могуць умацаваць супольнасці сталых людзей, стварыць дадатковыя магчымасці для задавальнення іх патрэбаў.
Заняткі Акадэміі будуць адбывацца ў інтэрактыўным фармаце. Праводзіць іх будуць эксперты з вялікім досведам працы ў галіне навучання дарослых (у тым ліку – сталых людзей).
У дадатак да заняткаў у праграме Акадэміі запланаваныя і цікавыя вечаровыя інтэграцыйныя мерапрыемствы.
Каго запрашаем у Акадэмію?
Прыярытэт пры адборы ўдзельнікаў Акадэміі будуць мець актыўныя сталыя людзі ва ўзросце 55+, якія прадстаўляюць арганізацыі і ініцыятывы, што ўваходзяць у склад кааліцыі.
Мы вітаем таксама заяўкі ад іншых арганізацыі і ініцыятыўных груп сталых людзей з розных рэгіёнаў Беларусі.
Колькі каштуе ўдзел у Акадэміі?
Арганізатары Акадэміі забяспечаць за свой кошт пражыванне ўдзельнікаў у двухмясцовых нумарах, трохразовае харчаванне, навучальныя матэрыялы.
Удзельнікі Акадэміі будуць часткова аплочваць выдаткі на праезд да Мінска. Дадатковая інфармацыя пра гэта, а таксама пра месца правядзення Акадэміі, будзе накіраваная тым удзельнікам, якія дашлюць заяўкі на ўдзел.
Як заявіцца на ўдзел у Акадэміі?
Для гэтага трэба запоўніць да 5 жніўня анкету-заяўку на ўдзел у Акадэміі. Пра вынікі адбору будзе паведамлена да 12 жніўня.
Хто фінансуе правядзенне Акадэміі?
Акадэмія Лідэраў Залатога Веку працуе ў межах праекта, які здзяйсняецца міжнародным грамадскім аб’яднаннем “Узаемапаразуменне” (Мінск) у партнёрстве з шэрагам іншых сябраў кааліцыі пры спрыянні Праграмы падтрымкі Беларусі (ППБ).
Праграма падтрымкі Беларусі рэалізуецца Дортмундскім міжнародным адукацыйным цэнтрам (IBB Dortmund) па даручэнні Федэральнага міністэрства эканамічнага супрацоўніцтва і развіцця (BMZ) і Германскага таварыства па міжнароднаму супрацоўніцтву (GIZ).
Як працавала першая Акадэмія?
Першая Акадэмія Лідэраў Залатога Веку працавала летам 2019 г. пад Слонімам.
Пра тое, як тады праходзілі заняткі і хто браў у іх удзел – чытайце на нашым сайце.
